বোকার ফসল বেলে পোকায় খায়। এই কথাটার জৈন্য গিরস্ত এখন চালাক হইছে। পোকায় আর ফসল খাইবে কি গিরস্তর ঘরেই এখন খেত বারির পোকা মারার নাইগেছে। কয়দিন থাকি তো ভাদোর মাসি নমলা ঝড়ি হইল ।
আর এই নমলা জড়ির জৈন্যে আগুর হাই বিট ধান মাঝিলা হাই বিট ধান এমন কি কয়দিন আগোত যে পানির অভাবে মানুষ স্যালো দিয়া ছেওতি দিয়া পানি ছেকি নমলা ওয়া গিলা নাগাইছে সেই গিলাতো মাজরা পোকা, পামরি পোকা, জাত পোকা, পাতা মোড়া পোকা, ফড়িং পোকা, ফুতি পোকা, থাকি আরো কতো পোকা আসি ধান বাড়ীত ভত্তি হইছে।
আর আগুর যেলা হাই বি ধান নাগাইছে সেই গিলার তো ধান বেড়ায়ছে সেই বেড়া ধান গিলাত নাল গান্ধি, সাদা গান্ধি আর কালা গান্ধি পোকার হিড়িক নাগি গেইছে। গিরস্তে আর বসি নাই। ধানের যে দাম সেই জৈন্যে ওমরা ইলাও কমর বান্দি বাপে বেটায় পোকা মাড়া দাওয়া এসপ্রে করির নাইগছে। সময় থাইকতে সাবদান হওয়া ভালো। সেই জৈন্যে যে খ্যতোতে পোকা আক্রমন কইরছে সেই খ্যতোতে দাওয়া দিবার নাইগবে নাইতে ধানতো দুরের কথা খ্যরো পাইবেন না।
ভালো চান তো সকাল বিকাল খ্যত বারি দেখা শুনা করি সময় মতন টিটমেন নিবেন নাইতে পোকায় ফসল খাইলে নিজেকে না খেয়া থাকির নাইগবে। আর গত বছরের মতোন করবেন না। এবার দেওয়ার আবহাওয়া দ্যখি আগাম আলু গারমেন না। হইলে গতবারের মতো অবস্থা হবার পায়। ভাবি চিন্তি আবাদ সুবাদ করির নাগবে।
